من قديم دافنشي
سالفة ريال عنده 4 حريم
أهو ريال ميسور الحال “تاير ولد تاير وعنده أكثر من حفيز و وكالة ” ، فزه ورزه وزوله ملفه وله هيبة ما خذها طبعاً من فلوسه ومركزه الاجتماعي
الحاصل ، إنقول قصة صاحبنا وحريمه الأربع
يموت على الأخيرة يحبها وايد وايد وما يقصر عليها بأي شي مونسها ومسكنها بقصر في أحسن المناطق، وحوالينها الخدم والحشم من كل صوب يحوفونها ويشوفون طلباتها
الثالثة هم بعد يحبها، ويتباهى فيها بين الناس وعند المجتمعات الراقية (ربعهم الأغنية) بس دايم الدوم خايف منها لا إتخليه واتهده وتروح حق واحد ثاني ، لأنها غنية و وارثة فلوس وايد من أهلها ومو محتاجتله
الثانية فقيرة مسكينة صبورة وهادية وهي الصدر الحنون له اللى يلجأ له لا ضاقت فيه الوسيعة، واقفة معاه بشدته قبل رخاه وقفت رياييل و سباع ، وعلى سبيل المثال : لما خسر نص فلوسه في مشروع فاشل، كانت خنت حيلي أول من وقف معاه وصارت له الجسر إلي عبر منه إلى بر الأمان ورجع ثروته
وصلنا عند حرمته الأولى كان لها الدور الأكبر في حياته، وهي إلى ساهمت في تفوقه على باجي ربعه التييار، هي أم عياله سنده وذخره ، مسيكينه بالرغم من هذا ما يحبها مثل ما أتحبه إهي
وبيوم من الأيام حاشته أزمة قلبية وطاح بالفراش (فراش الموت اسم الله علينا وعليكم)، وحس أن موته قريبة ومفنقش
قال أنا موات خلاص قام ويمع حريمه الأربعة، تكشخوا وتزهلقوا وراحوا له ، مساكين قالوا بوزع الورث مادروا شنو الطبخة ، وكل وحده منهم قامت اتمدح فيه واتبجبج عليه واتحجي واتقول في كرمه وطيبة
المهم ما أطوله عليكم
سألهم سؤال، قال لهم : أنا ميت منهي فيكم إلى بتلحقني واتونسني وتشغل وحدتي في قبري ، عقب ما أخليكم
قاموا يتحلطمون وكل وحده تفكر بشي
الرابعة// صرخت وقالت: العب غيرها يا عمري شوف حريمك الباجي أنا توني صغيرة وحلوا وما شفت شي من دنيا أبي استأنس عندك حريمك العيايز
الثالثة// قالت: أخلي فلوسي من حقه، أبي أعيش باجر أتزوج واحد صغيرونو يدلعني ويعوضني وحسسني بهذي الحياة
الثانية// أنا وقفت معاك وماقصرت كل مشكلة إطيح فيها اتييني تركض وأساعدك، بس عاد أعتمد على نفسك هالمره، دبر حالك
قامت مرته الأولى// وبدون مقدمات قالت له: أفا عليك يا أبو عيالي
أنا معاك وين ما أتروح حتى لو القبر، الدنيا من غيرك مالها طعم
وكانت هذي المفاجأة إلى ما توقعها صاحبنا إلى ما عطاها شي في دنيته إهيا إلى ما قصرت معاه وعطته كل شي، التفت وطبطب عليها وقال لها وهو ينازع (يلفظ أنفاسه الأخيرة)، أنا غلطت في حقج وايد وقصرت وكان لازم أعتني فيج أكثر لما كنت أقدر
ولا ييتوا للصج
ترى إحنا كلنا عندنا أربع حريم، إشلون أنا أقول لك إشلوون
الحرمة الرابعة / هى جسمك إلى إنهدسه وانزقرته (نهتم بشكله وملابسه) وحاطين كل يهدتنا فيه بخلينا لي متنا
الحرمة الثالثة / هى أفلوسنا وحلالنا إلي شقينا عمرنا إنيمع فيه وبالآخر بنخليه حق غيرنا يلعبون فيه
الحرمة الثانية / هى أهلنا وأقاربنا وربعنا ويانا طول ما إحنا عايشين، ولي متنا يوصلونا للقبر كثر الله خيرهم وتالي يمشون وينسونا بدنيته ومشاغلها
الحرمة الأولى / هى خنت حيلي عليها هذي نفسنا و( روحنا) اللى ناسينها في زحمة مشاغل الدنيا وركضنا ورا الفلوس وملذات الدنيا، هاملينها وذاك من ذاك إذا ألتفتنا عليها وشفنا شنو ناقصها
بالنهاية
ما عندي شي أقوله غير ((الحقيقة هي إلي باقية في النهاية، وهي إلي راح تتبعنا وين ما رحنا))
الحياة قصيرة وسريعة خلونا نستمتع فيها بس بشرط لا ننسى أنفسنا ترى الحرمة الأولى هم لها حق علينا، والأمر ما يخلا من التنقل بين الحريم وكل وحده فيهم عطها حقها وخذ منها حقك ولا أتفرط فيه
أعمل لدنياك كأنك تعيش أبدا
وأعمل لآخرتك كأنك تموت غداً
ساعد في مراجعة النص الأصلي زميلة تتقن كلام العجايز
لأنكم مثل ما انتو عارفين دافنشي ايطالي
لازم يكون البوست بلغة أهل الكويت
أتمني نكون وفقنا في إيصال المعلومة
و نرجو المسامحة علي القصور
كلنا ذاك الرجل ، نخاف ما نستحي
تحياتي
Posted September 17, 2007 by Q8Davinci under شخابيط
September 17th, 2007 at 3:36 pm
بالنسبة للقصة من المنحى الواقعي
فأقول الى جهنم وبئس المصير هذا الرجل الي متزوج أربعة وحارق قلوبهم
ومن المنحى الفلسفي فالله يسامحك مافي مثال أحسن من هذا الي يحرق الدم؟؟
كل عام وأنت بخير
September 17th, 2007 at 4:42 pm
Wow! the correlation between the story & reality is amazing
September 18th, 2007 at 6:52 am
white wings
اتفق معاك في الحكم علي سي السيد بجهنم و بئس المصير لكن هذا النوع من الناس جهنمه هي في الدنيا بين الأربع
اما فلسفياً فسلامتك من حرق الدم فهذا المثال اكثر وقعاً و إيلاماً على النفس حيث يؤثر في القارئ ليشده نحو ما حصل لك من شعور غير طيب و هذا هو الهدف
سلامات و الله يبعد عنك الشر
تحياتي
September 18th, 2007 at 6:54 am
chikapappi
مشكورة عزيزتي
اطراء اشكرك عليه
تحياتي